افغانستان او آیرلنډ ۳ یو ورځینۍ مسابقې کوي
تاند- د افغانستان او آیرلنډ د کرکټ ملي لوبډلې به راتلونکې میاشت د افغانستان په کوربه توب په شارجه کې ۳ یو ورځینۍ نړیوالې مسابقې وکړي.
دا مسابقې به د شپې او ورځې له لوري د دسمبر په ۵، ۷، او ۱۰ مه وي.
آیرلنډ به تر دې مخکې د روان نوومبر په ۲۹ مه او د دسمبر په ۲مه په دوبۍ کې له سکاټلنډ سره د کرکټ د نړیوالې شورا په نړیوال کپ سیالیو کې مخامخ شي.
آیرلند دا سیالۍ ۴ ځلې ګټلي او اوس په درجه بندۍ یا رینکینګ کې له افغانستانه وروسته ځای لري.
آیرلنډ او افغانستان دواړه لېواله دي چې د ۲۰۱۸ په مارچ کې د کرکټ د نړیوالې شورا د نړیوال جام د غوراوي تر سیالیو مخکې د کمو اوورونو ګڼې سیالۍ وکړي.
د آیرلنډ د کرکټ ادارې رييس وارن ډیوتروم وايي، د افغانستان او آیرلنډ مسابقې به نه یوازې د درجه بندۍ له نظره د دوو ډېرو سره نژدې ټیمونو مسابقې وي، بلکې دا به د ټیست مقام ته د دوو رسېدلیو هیوادونو سیالۍ وي.
د افغانستان د کرکټ بورډ اجرايي ريیس شفیق الله ستانکزي هم دا سیالۍ د دواړو هیوادونو د لوبډلو لپاره یو ښه فرصت وباله.
د افغانستان او آیرلنډ لومړۍ یو ورځینۍ مسابقه به د دسمبر په پنځمه /سې شنبه/ د شارجې د کرکټ په لوبغالي کې وي.
