د افغانستان د فوټبال ۱۶ کلن ټیم قرغیزستان ته ماتې ورکړه
تاند- د افغانستان د فوټبال ۱۶ کلنو لوبډلې د ۲۰۱۸ اې ایف سي کپ ته د غوراوي لپاره خپله لومړۍ مسابقه وګټله.
په دې سیالۍ کې، چې نن /شنبه/ د ایران مرکز تهران ته نژدې د کرج ښار په انقلاب لوبغالي کې وشوه، افغان لوبغاړو د قرغیزستان د شپاړس کلنو لوبډلې ته ۳ په ۱ ماتې ورکړه.
د ۲۰۱۸ کال په سیالیو کې، چې په مالیزیا کې کېږي، ۱۵ لوبډلې ګډون کوي خو دغو لوبو ته د رسېدو لپاره د ۴۴ ټیمونو ترمنځ سیالۍ کېږي.
د ۲۰۱۶ کال په سیالیو کې عراق اتلولي ګټلې وه.
افغانستان له ایران، قزاقستان، لبنان او بوتان سره په سي ګروپ کې دی.
