فوټبال: افغانستان سینګاپور ته ماتې ورکړه
تاند- د افغانستان د فوټبال ملي لوبډلې نن /پنجشنبه/ په یوه دوستانه سیالي کې د سینګاپور لوبډلې ته ۲ – ۱ ماتې ورکړه.
په دې سیالۍ کې، چې د قطر په پلازمېنه دوحه کې وشوه، لومړی ګول افغان لوبغاړو د لومړۍ نیمايي په لومړیو شېبو کې وواهه.
د شریف محمد له لوري له لومړي ګولو وروسته سینګاپور د لوبې د مساوي کولو هڅه وکړه او په دې کار بریالی هم شو.
خو د دوهمې نیمايي په لومړیو شېبو کې د افغانستان مصطفي ازادزوی ګول وواهه او لوبه یې دوه پر یو کړه.
همدا نتیجه د لوبې تر پایه پاتې شوه او افغانستان د دې دوستانه سیالۍ ګټونکی شو.
دا دوستانه یا تمریني سیالي له ویتنام سره د افغانستان د رسمي مسابقې په درشل کې وشوه چې ټاکل شوې ده د مارچ په اته ویشتمه وشي.
له ویتنام سره د افغانستان مسابقه د ۲۰۱۹ کال د فوټبال د غوراوي لومړۍ مسابقه ده.
