د ایران د فوټبال فدرېشن وايي، ښځو سهواً د فوټبال د مسابقې ټکټونه اخیستي
تاند- د ایران د فوټبال فدرېشن اعلان وکړ چې ښځې نه شي کولی د دغه هیواد او سوریې د فوټبال د ملي لوبډلو ترمنځ مسابقه په لوبغالي کې وویني.
د ایران د فوټبال فدرېشن دا اعلان وروسته له دې وکړ چې یو شمېر ایرانیانو په ټولنیزو شبکو (ټویټر، انسټاګرام او فیسبوک) کې ولیکل چې ګڼ شمېر ښځو هم د تهران په (ازادي) لوبغالي کې د ایران او سوریې ترمنځ د مسابقې ټکټونه اخیستي دي.
په ایران کې پر ښځو د فوټبال د مسابقو د لیدلو بندیز دی. خو دا ځل د انلاین ټکټ اخیستو په فورمه کې د جنسیت برخه هم وه ځکه یو شمېر ښځو ټکټ واخیست.
ګڼ شمېر ښځو په دې خوښي ښکاره کړه چې د لومړي ځل لپاره اجازه ورکړای شوې چې د فوټبال مسابقه وګوري.
د ښځو له خوشالۍ لا څو ساعته نه ول تېر شوي چې د ایران د فوټبال د فدرېشن ريیس وویل چې د دوی دریځ بدل شوی نه دی او ښځې لا هم د هلکانو د فوټبال مسابقه لیدلی نه شي.
دوی وايي چې ۸۰ ښځو ټکټونه اخیستي او پیسې به یې بېرته ورکړای شي.
