د کرکټ نړیوالې شورا د لوبغاړو تازه درجه بندي اعلان کړه
تاند- د کرکټ نړیوالې شورا د انګلیستان او جنوبي افریقا ترمنځ له وروستۍ ټیسټلوبې (ټیست سریز) وروسته د لوبغاړو نوې درجه بندي اعلان کړه.
د کرکټ د نړیوالې شورا یا آی سي سي د ټیست په ۱۰ تر ټولو ښو باولرانو کې د هند جدیجه لومړی او د انګلیستان جېمز انډرسن دوهم بلل شوي دي.
د هند ایشون درېم، د استرالیا جوش هیزل ووډ څلورم او د سریلانکا رنګانا پنځم بلل شوي دي.
د کرکټ د نړیوالې شورا پراساس په ال رونډرانو کې د هند جدیجه لومړی، د بنګله دېش شکېب الحسن دوهم، د هند ایشون درېم، د انګلیستان معین علي څلورم او د انګلیستان بن ستوکس پنځم ځای لري.
د کرکټ د نړیوالې شورا له تازه درجه بندۍ سره سم تر ټولو ښه پېټسمن د استرالیا کیپتان سټیون سمیت دی.
ورپسې د انګلیستان جور روټ او د هند چینیشور پچارا دی.
