د کرکټ د نړیوالې شورا بشپړ غړیتوب څوک خوشاله کړي او څوک سوځولي؟
تاند- په داسې حال کې چې افغانستان ته د کرکټ د نړیوالې شورا د بشپړ غړیتوب د ورکولو په خاطر نړیوالې رسنۍ د افغان ځوانانو هڅې او زحمتونه ستايي، د بي بي سي فارسي خپرونه په دې سوځېدلې چې ولې کرکټ ته په افغانستان کې زیاته پاملرنه شوې او ګواکي د نورو سپورتونو حق خوړل شوی او ټول کرکټ ته ورکړل شوی دی.
د کرکټ او سپورټ ګڼو نړیوالو رسنیو د کرکټ د نړیوالې شورا بشپړ غړیتوب ته د افغانستان د لوبډلې د رسېدو بېلابېل مثبت دلایل یاد کړي دي.
د مثال په توګه سپورټس کیدا ویبپاڼه وايي، ۵ دلایل سبب شول چې افغانستان د ټیسټ مقام ترلاسه کړي. (دلته یې لوستلی شئ)
خو بي بي سي فارسي وايي، د کرکټ د بشپړغړیتوب له ترلاسه کولو وروسته به د افغانستان کرکټ بورد ته د کرکټ نړیواله شورا د کال شاوخوا ۴ ملیون ډالره ورکوي چې دا د افغانستان د حکومت د بدني روزنې د ریاست د ټولې بودجې ۴ برابره ده او د هغې بودجې ۳ برابره ده چې همدا اوس یې د فوټبال نړیوال فدرېشن د افغانستان د فوټبال فدراسیون ته ورکوي.
بي بي سي وايي چې د کرکټ د پرمختګ اصلي علت دا دی چې د افغانستان حکومت یوازې پر دې ورزش ډېره پانګونه کړې ده.
بي بي سي د مثال په توګه وايي چې د کرکټ بورډ له جوړېدو سره سم پخواني ولسمشر حامد کرزي خپل لوړ سلاکار شهزاده مسعود د دغه بورد رييس وټاکه او څو وزیران د بورډ غړی ول خو له نورو سپورتونو سره دا ډول چلند ونه شو.
بي بي سي د کرکټ د ملي لوبډلې د یوه لوبغاړي معاش ۳ زره ډالره بللی او ویلي یې دي چې د نورو معاش د میاشتې تر ۲۰ ډالره لږ دی.
خو دې راډیو دا نه دي ویلي چې دا پیسې د افغانستان حکومت ورکوي او که د کرکټ نړیواله شورا.
د افغانستان هیڅ ډله ییز ټیم حتي اسیايي لوبو ته د غوراوي له پړاوه تېر شوی نه دی.
بی بي سي دغه راز ادعا کړې چې د طالبانو د حکومت په مهال ټول سپورتونه منع شول خو کرکټ ته یې د خپل واک په وروستي کال اجازه ورکړه. حال دا چې د طالبانو د واکمنۍ په مهال د نارینه وو نور سپورتونه هم ازاد ول مګر هیچا ته یې اجازه نه ورکوله چې په نېکر کې د لوبې میدان ته ووځي. په ایران کې هم له اسلامي انقلاب راوروسته تر ډېرو کلونو پورې په نېکر کې پر لوبې بندیز و.
