په ننګرهار کې د سپورت د ودې لپاره جمنازیم جوړېږي
د ننګرهار والي وايي، ډير ژر به په ننګرهار ولايت کې د ورزش له پرمختګ سره د مرستې لپاره د جمنازيم د جوړيدو چارې پيل شي.
ننګرهار والي دا خبره د دې ولايت د غړیو د ښکلا یا باډي بلډنګ د غوراوي د سیالیو لپاره په جوړو شوو مراسمو کې وکړې.
ننګرهار والي سليم خان کندوزي وويل، هڅه به وکړي چې په نږدې راتلونکي کې د سپورت د لا پرمختګ لپاره د جمنازيم د جوړيدو چارې پيل کړي.
ده وويل، د جمنازيم په جوړيدو سره به د ورزشکارانو هغه ستونزې حل شي چې دا مهال ورسره مخ دي.
ننګرهار والي راټولو شويو ورزشکارانو ته ډاډ ورکړ چې په بېلا بېلو برخو کې د اسانتياوو برابرولو ترڅنګ به د دوی د هڅونې په موخه ګڼ پروګرامونه اجرا کړي.
په ننګرهار کې د بدني روزنې امر شاهدا لله ساپي د غړو ښکلا د غوراوي سياليو ترسره کېدو پر مهال وويل، دغه سيالۍ د غړو ښکلا فدراسيون له لوري د جلال اباد ښار له اوو کلپونو څخه د پنځه ويشت تنو ورزشکارانو په ګډون په شيرزي لوبغالي کې کېږي چې لومړی مقام د قيس شګيوال کلپ ترلاسه کړ.
نوموړي وويل: د سياليو دويم مقام مطيع الله کلپ او دريم مقام ارشاد کلپ خپل کړ.
ساپی وايي ، د دې سياليو موخه د ننګرهار دغړو ښکلا منتخبې لوبډلې ته د غوره لوبغاړو پيژندل دي چې په وينا يې دغه سيالۍ په کال کې يو ځل ترسره کېږي.
د بدني روزنې امر د غړو ښکلا فدراسيون مسوول وارث صديقي څخه مننه وکړه ،چې د يادو سياليو ترسره کېدو لپاره يې پوره هڅې وکړې او د نورو فدراسينونو له مسوولينو يې غوښتنه وکړه ،چې د ورزشکارانو لپاره د سياليو ترسره کېدو هڅې وکړي.
د سياليو په پای کې لوبغاړو ته کپونه، مډالونه او جايزې ورکړل شوې.
