پاکستان او سریلانکا د لومړۍ لوبې له لغوې وروسته نن دوهمه یو ورځنۍ سیالۍ کوي

په پام کې ده، نن دوشنبه د پاکستان او سرېلانکا کرکټ ملي لوبډلو ترمنځ دا لوبه د افغانستان پر وخت د ماسپښین په دوه نیمو بجو پېل شي، چې د دواړو لوبډلو ترمنځ د پاکستان په کوربه توب لومړی درې ۵۰ اوریزې او ورپسې درې شل اوریزې لوبې ترسره کېږي.
پاکستان ته د سریلانکا لوبډلې زیات شمېر نوي لوبغاړي ورغلي او پخواني تجربه کار لوبغاړي په کې نشته دی.
دا په داسې حال کې ده ، چې په ۲۰۰۹ کال کې پر سریلانکا لوبډله پاکستان کې مرګونی برید شوی و؛ چې له هغې وروسته نړیوالې لوبډلې او لوبغاړي پاکستان ته د ورتګ زړه نه ښه کوي.

یاده دې وي چې ددې دواړو کرکټ ملي لوبډلو تر منځ لومړۍ پنځوس اوریزه سیالۍ د جمعې په ورځ ترسره کېده چې د پرلپسې اورښت له امله لغوه اعلان شوه، ورپسې بیا دوهمه یو ورځنۍ سیالۍ چې په لومړېو کې یکشنبه پلان شوې وه، نن (دوشنبه) ته پلان شوه.