تاند(سه شنبه، د اسد ۱۴) د ۴۰۰ طالب بندیانو د برخلیک ټاکلو لپاره ولسمشر غني پریکړه کړې چې د اسد ۱۷مه لویه جرګه په کابل کې د سولې مشورې لپاره جوړه کړي.
یو شمیر سیاسي کارپوهان او مدني فعالان د دې جرګې جوړیدل ګران بولي.
د هرات یوه سیاسي کارپوه نوید همت وویل چې ولسمشر غني د خپل واک د ساتلو لپاره د سولې خبرې ځنډوي.
همت په دې باور دی چې اوسنی حکومت د سولې پروسې د ګډوډولو لپاره له هرې وسیلې کار اخلي.
د سمنګان سیاسي کارپوه رضا محمد وویل، لویه جرګه به د سولې سمبولیکې شورا وي چې د ۴۰۰ طالب بندیانو برخلیک ټاکي او د افغانستان د سولې خبرې ګړندۍ کوي.
د رضا محمد په وینا، د دا ډول جرګې اجنډا د حکومت لخوا ترتیب شوې او له همدې امله کومه مثبته اغیزه نلري.
په عین وخت کې، په غور ولایت کې یو مدني فعال شیرشاه سلیم تاند ته وویل چې د مشورتي لویې جرګې جوړیدل به د افغانانو ترمنځ د سولې خبرو اترو د اوږدېدو لامل شي.
سلیم وایي چې د قانون له مخې حکومت کولی شي د ۴۰۰ طالب بندیانو د خوشې کیدو په اړه له مقننه او قضایي قوې سره سلا مشورې وکړي.
د هغه په وینا، د سولې مشورتي لویې جرګې جوړول نه یوازې د ملیونونو افغانیو لګښت غواړي، بلکې خلک به ځوروي او امنیتي ګواښونه به ډیر کړي.
د ولسي جرګې ځینې غړي وايي چې ولسمشر غني له مقننه قوې سره مناسب اړیکې او همغږي نه لري.
د ولسي جرګې ځینو غړو رسنیو ته وویل چې د دولتي عوایدو څخه ملیونونه افغانۍ د عصبي شرایطو او اقتصادي بې وزلۍ سربیره به د سولې مشورتي جرګې په جوړولو ضایع کیږي.
هغوې ټینګار کوي چې د دې خطرونو سربیره، د کورونا ویروس خپریدل هم مخ په ډیریدو دي.
په ورته وخت کې، ولسمشر غني د لوی اختر په لومړۍ ورځ د لویې جرګې د جوړولو پلان اعلان کړ او ویې ویل چې د اساسي قانون او د جزا قانون له مخې هغه د ۴۰۰ طالب بندیانو د خوشې کولو واک نه لري او لویه جرګه باید په دې اړه پریکړه وکړي.
دحکومت لوړی پوری چارواکي غواړی چي سولۍ خبري ګډوډی کړی ، اوبله موخه يي داده چي بودجه پکی مصرف کړی اوعیش نوش کړی .اوپاتي دنه یی خپله نیمګړی کابینه په همدی کډوډی پوره کړی .اوس ټول پوهیږی چی غوا توره پي يي سپینۍ ……..