تاند (پنجشنبه، د اسد ۹) د ملي دفاع وزارت وايي چې په لوګر او بغلان ولایتونو کې یې ۱۵ وسله والو طالبانو ته مرګژوبله اړولې ده.
د ملي دفاع وزارت څخه په خپره شوې خبرپاڼه کې راغلي چې طالبانو غوښتل تېره شپه د لوګر ولایت په څرخ ولسوالۍ کې د ملي اردو پر پوستو بریدونه وکړي، خو د امنيتي ځواکونو له خوا یې مخه نیول شوې ده.
سرچینه وايي چې ددې نښتې په پایله کې پینځه تنه طالبان وژل شوي او دوه نور ټپیان دي.
د یو بل خبر له مخې وسله والو تېره شپه د بغلان ولایت د چشمه شېر ولسوالۍ په مربوطاتو کې په امنیتي پوستو بریدونه کړي چې په پایله کې یې ۸ تنه وسله وال طالبانو وژل شوي دي.
طالبانو دغه بریدونه په داسې مهال کړي چې سر له سبا به د افغانستان حکومت او طالبانو تر منځ د لوی اختر په مناسبت درې ورځنی اوربند پیل شي.
طالبانو تر اوسه ددغه بریدونو په اړه څه نه دي ویلي.