خبریاله: عاقله اسد (جمعه، د سرطان ۲۰) په افغانستان کې حکومتي چارواکي وایي، پاکستان ته د غنمو د قاچاق په اړه اندیښمن دي او د دغه بندر څخه د حکومت جدي نظارت غوښتنه کوي. د افغانستان د کرنې، اوبولګولو او مالدارۍ وزارت او د صنعت او کانونو خونې چارواکي وایي، پاکستان ته د قاچاق کېدونکو غنمو د اندازې په اړه کره معلومات نه لري.

هغوې وایي چې ډېر غنم د افغانستان له جنوبي ولایتونو څخه قاچاق کېږي.

په وروستیو کې د هلمند خلکو له دې درکه اندېښنه ښودلې وه او ویلي و چې پاکستان ته د غنمو د قاچاق کېدو له کبله د غنمو بیه لوړه شوې ده.

افغانستان په کال کې شاوخوا ۶.۳ ملیون ټنه غنمو ته اړتیا لري.

د کرنې وزارت په وینا، که څه هم په کال کې له ۴.۸ میلیونه ټنو څخه زیات غنم تولیدیږي، خو دا کورنی مصرف نه پوره کوي.

افغانستان شاوخوا ۲ میلیونه  تنه خلک اوړه او غنم له مرکزي آسیا او پاکستان څخه واردوي.

د افغانستان د کرنې، اوبولګولو او مالدارۍ وزارت ویاند اکبر رستمي وویل، دې وزارت مخکې له پاکستان څخه افغانستان ته د غنمو قاچاق په اړه د شکایتونو اړوند چارواکو ته رسمي مکتوب استولی و او د غنمو د قاچاق د مخنیوي غوښتنه یې کړې وه.

ښاغلي رستمي وویل چې د دې محصول د اندازې له زیاتوالي سره سره  افغانستان پلان لري شاوخوا دوه ملیونه ټنه غنم له نورو ګاونډیو هیوادونو څخه وارد کړي.

د افغانستان د صنایعو خونه هم د غنمو قاچاق په اړه اندیښنه څرګنده کړې او له حکومت څخه یې غوښتي چې د لقاچاق مخه ونیسي او د اوړو پر وارداتو مالیه زیاته کړي. د دې ادارې د چارواکو په وینا د اوړو د مالیې په ډیریدو سره به سوداګر غنم وارد کړي او د هیواد د اړمنو ستونزې به راکمې شي.

په کوټه کې د عامه اړيکو او رسنيو مشر عبدالناصر رشتيا وويل، په پاکستان کې د غنمو پر کروندو د ملخانو د يرغل او د فصلونو د ويجاړېدو له امله اوس يو شمېر خلک پاکستان ته غنم قاچاق کوي، چې ناوړه پايلې به ولري.

د افغانستان ولسمشر د دولت د ستراتیژیکو زیرمو څخه زیانمنونکو ته د ۲۴ زره ټنو غنمو د ویش امر کړی. هغه د خوراکي توکو په قاچاق باندې د حکومت د ځینو چارواکو په ناسمې څارنې انتقاد کړی دی.