تاند، یکشنبه، د سرطان لومړۍ: د بهرنیو چارو سرپرست وزیر حنیف اتمر چې د اووه وزارتونو، پنځو خپلواکو ریاستونو ، د ولسمشر د حقوقي سلاکار دفتر او د ملي امنیت شورا دفتر څخه د ۴۵ کسیز پلاوي په مشرۍ ایران ته تللی، نن یې لومړۍ لیدنه له جواد ظریف سره کړې ده.
د افغانستان د بهرنیو چارو وزارت وایي، دغه لیدنه کې له ایراني چارواکو سره د افغان کارګرو د وژنې وروستیو خونړیو پیښو ته د رسیدنې، د بیا تکرار د مخنیوي لپاره د یوې لارې موندلو ، د دوه اړخیزو همکاریو سند د پیاوړتیا په تړاو خبرې اترې او بحثونه شوي دي.
همدا راز د ایران د بهرنیو چارو وزارت د لویدیزې اسیا عمومي رییس سید رسول موسوي هم د حنیف اتمر د سفر هدف دا ښودلی چې د دواړو هیوادونو د اقتصادي، اجتکاعي او سوداګریزو اړیکو راتلونکې باندې به د دواړو لوریو تر منځ خبرې اترې وشي.
موسوي ویلي، د حنیف اتمر د سفر په اړه د ایران او افغان ولسمشرانو تر منځ ټلیفوني تماس کې هوکړه شوې وه.