تاند_ پنجشنبه د وږي ـ سنبلې ۲۶مه/ د نورستان د کرنې، اوبولګولو او مالدارۍ ریاست وايي، چې د اټکل له مخې سږ کال به په دغه ولایت کې د جلغوزیو له طبیعي ځنګلونو شاوخوا ۱۲۸ مټریک ټنه حاصلات ترلاسه شي.
د یاد ریاست د خبرپاڼې له مخې، د دغو جلغوزیو حاصلاتو راټولولو او مدیریت له لارې به شاوخوا ۷.۵ میلیونه افغانۍ عواید ترلاسه شي.
خبرپاڼه کاږي چې دغه عاید به د نورستان د خلکو په اقتصادي پیاوړتیا کې مهم رول ولري.
د سرچینې په وینا، د جلغوزیو د طبیعي ځنګلونو ښه مدیریت، د اړوندو کسانو د ظرفیت لوړول او روزنیزو پروګرامونو ترسره کول هغه اقدامات دي، چې سږ کال په دغه ولایت کې د جلغوزیو حاصلاتو د زیاتېدو لامل شوي دي.
خبرپاڼه کې د یاد ریاست د معلوماتو له مخې، د نورستان ولایت په مرکز او ولسوالیو کې د جلغوزیو شاوخوا ۳۱۱۵ هکتاره طبیعي ځنګلونه شته.
د یوه بل خبر له مخې په کاپیسا ولایت کې هم روان کال د جلغوزيو حاصلات ۴۰ سلنه زیات شوي دي.
دې ولایت کې د کرنې ریاست د مسوولانو په وینا ١١ زره هکټاره ځمکه باندې د جلغوزيو ځنګلونه شته، چې د تېر کال په پرتله یې سږ کال حاصلاتو کې د پام وړ زیاتوالی راغلی.
جلغوزي د افغانستان له ځانګړو وچو مېوو څخه دی چې، د افغانستان په یو شمېر ولایتونو کې دغرییزو سیمو د خلکو د عاید ستره سرچینه بلل کېږي.
دغه راز افغان جلغوزي په هېواد دننه او د باندې په یو شمېر هېوادونو کې ښه بازار او په ښه بیه پلورل کېږي.