تاند (یکشنبه د اسد/زمري ۱۱مه) د افغانستان د تکواندو فدراسیون ویلي چې، د اندونیزیاله لوري د ویزو د نه ورکړې له امله د تکواندو ملي لوبغاړي د ۲۰۲۶کال د اسیا په تکواندو سیالیو کې له ګډون څخه پاتې شوي دي.
تر دې وړاندې د افغانستان د والیبال ملي لوبډله پاکستان ته او د فراه ابومسلم لوبډله بوتان ته د سفر پرمهال له ورته ستونزې سره مخ شوې وې.
یاد فدراسیون وایي، سره له دې چې رسمي بلنلیکونه ترلاسه شوي او ټول اداري پړاوونه بشپړ شوي؛ خو کوربه هېواد د کوم څرګند دلیل پرته دوی ته وېزې ورنکړې.
د سرچېن په باور، دغه پرېکړه یوازې د یوې سیالۍ له لاسه ورکول نه دي؛ بلکې د ملي لوبډلې پر تخنیکي پروګرامونو او چمتووالي یې هم منفي اغېز کړی.
د پلان له مخې؛ ټاکل شوې وه چې د افغانستان ملي لوبغاړي د ۲۰۲۶کال د جاپان د ناګویا اسیايي لوبو څخه مخکې د اندونیزیا په ازادو سیالیو کې ګډون وکړي.
د تکواندو فدراسیون د تکواندو له نړیوال فدراسیون او د اسیا د تکواندو له ټولنې غوښتي، چې د نړیوالو سیالیو د کوربهتوب سپارلو پرمهال د کوربه هېوادونو د ویزو د ورکړې وړتیا او ټولو لوبغاړو لپاره د ورته فرصتونو برابرول هم په پام کې ونیسي.