تاند (د زمري/ اسد ۸ مه) جاپان د نفوس د کمېدو او د زېږون د کچې د پرلهپسې ټیټېدو د ستونزې د حل لپاره د مصنوعي ځیرکتیا (AI) پر بنسټ د ژوند د ملګرو موندلو یو نوښتګر پروګرام پیل کړی، چې د چارواکو په وینا تر اوسه یې لږ تر لږه ۲۶۵ جوړې د واده تر پړاوه رسولې دي.
دغه پروګرام د جاپان په پلازمېنه توکیو کې د سیمهییز حکومت له لوري پر مخ وړل کېږي او هدف یې دا دی چې د هغو کسانو لپاره، چې د ژوند د مناسب ملګري په موندلو کې ستونزه لري، د ټکنالوژۍ په مرسته ښه او دقیق انتخابونه برابر کړي.
د دې سیستم د کارولو لپاره ګډونوال لومړی یوه مفصله پوښتنپاڼه ډکوي. په دې کې نه یوازې عمر، زدهکړې، دنده او نور شخصي معلومات ثبتېږي، بلکې د ژوند ارزښتونه، شخصیت، راتلونکې موخې، د کورنۍ په اړه نظرونه او د واده تمې هم ارزول کېږي. وروسته مصنوعي ځیرکتیا د دغو معلوماتو پر بنسټ تر ټولو مناسب کسان یو له بل سره وصلوي.
چارواکي وايي، دا سیستم یوازې د ظاهري ځانګړنو یا دودیزو معیارونو پر بنسټ نه، بلکې د شخصیت، فکر او ګډو ارزښتونو له مخې د جوړو د بریالیتوب احتمال زیاتوي.
د راپور له مخې، تر اوسه زرګونه کسانو په دې پروګرام کې نوملیکنه کړې او له همدې لارې ۲۶۵ جوړې واده ته رسېدلې دي. چارواکي هیله لري چې دا نوښت به د جاپان د زېږون د کچې په لوړولو او د نفوس د کمېدو د بحران په مهارولو کې مرسته وکړي.
جاپان له څو کلونو راهیسې د نړۍ له هغو هېوادونو څخه دی چې د زېږون کچه یې تر ټولو ټیټه ده او نفوس یې په چټکۍ سره د زړښت پر لور روان دی. حکومت د دې ستونزې د حل لپاره د ماشوم لرونکو کورنیو مالي ملاتړ، د ماشوم پالنې اسانتیاوې، د کاري ژوند د توازن پروګرامونه او اوس د مصنوعي ځیرکتیا پر بنسټ د ژوند د ملګرو موندلو نوښتونه هم پیل کړي دي.
کارپوهان وايي، که څه هم مصنوعي ځیرکتیا د واده او کورنۍ ټولې ستونزې نه شي حل کولی، خو د مناسب ملګري د موندلو بهیر اسانه کوي او د هغو کسانو لپاره نوې فرصتونه رامنځته کوي چې له دودیزو لارو د ژوند د ملګري په موندلو کې له ستونزو سره مخ وي.