تاند (دوشنبه د اسد/زمري ۶مه) د هند حکومت په خپل وروستي نظارتي اقدام کې د هغو څښاکونو تولیدوونکو ته چې د کافین لوړه اندازه لري، امر کړی چې نور به پر خپلو محصولاتو د «انرژۍ څښاک» (Energy Drink) نوم نه کاروي.
دا پرېکړه داسې مهال شوې چې په هند کې د دغو محصولاتو بازار په چټکۍ سره په پراخېدو دی او اټکل کېږي چې ارزښت به یې تر ۲۰۲۸ کال پورې ۱.۶ میلیارد ډالرو ته ورسېږي.
د هند د خوړو د خوندیتوب او معیارونو ادارې (FSSAI) ویلي، د دغه هېواد په قوانینو کې د «انرژۍ څښاک» لپاره کوم ځانګړی معیار یا رسمي کټګوري نه شته.له همدې امله، د «د بدن او ذهن د انرژۍ زیاتولو» یا «د عمومي کمزورۍ په له منځه وړلو کې مرسته کوي» په څېر ادعاوې کولای شي مصرفوونکي وغولوي.
رسنیو په راپورونو کې راغلي چې، دا پرېکړه د پپسي، ریډبول، مانسټر، هیل انرژي او همدارنګه د موکېش امباني اړوند ریلاینس شرکت په ګډون پر سترو تولیدوونکو هم تطبیقېږي.
دغو شرکتونو ته لارښوونه شوې چې د خپلو محصولاتو له بستهبندۍ څخه د «انرژۍ څښاک» یا ورته نومونه لرې کړي.
د څښاکونو تولیدوونکو شرکتونو له دې پرېکړې سره مخالفت کړی دی.
دوی وایي، د دې نوم لرې کول به د دوی د برانډ هویت ته زیان ورسوي او د محصولاتو پر پلور به منفي اغېز وکړي، ځکه د دغو څښاکو د بازارموندنې لویه برخه د انرژۍ د چټک زیاتوالي پر ادعا ولاړه ده.
خو د هند د خوړو د خوندیتوب او معیارونو ادارې مشر، راجیت پونهاني ټینګار کړی چې دا پرېکړه به بدله نه شي.
هغه ویلي، که شرکتونه اعتراض لري، کولای شي له قضايي لارو یې تعقیب کړي.