تاند (سې شنبه، د غبرګولي/ ۱۹ مه) د ملګرو ملتونو د امنیت شورا په غونډه کې د ایران استازي وویل د افغانستان او پاکستان ترمنځ د کړکېچ پر دوام اندېښنه وښوده.
د ایران استازي د طالبانو او پاکستان ترمنځ د خبرو اترو د اسانتیا لپاره د سیمهییزو هڅو هرکلی وکړ او ویې ویل چې د دواړو لورو اختلافات باید د خبرو او ډیپلوماسۍ له لارې حل شي.
هغه همداراز وویل چې له خپلو بنسټیزو حقونو څخه د افغان ښځو او نجونو دوامداره محرومیت لا هم د اندېښنې وړ موضوع ده. د هغه په وینا، د زدهکړو، کار، د تګ راتګ ازادي او په ټولنیز ژوند کې د ښځو د ګډون په برخه کې د طالبانو محدودیتونه «د اسلام له اصلي او حقیقي لارښوونو سره سمون نه لري.»
د ایران استازي ټینګار وکړ چې پر ښځو او نجونو لګېدلي محدودیتونه نه یوازې د هغوی انساني کرامت زیانمنوي، بلکې د افغانستان اوږدمهاله پرمختګ او اقتصادي ودې ته هم زیان رسوي.
هغه له طالبانو وغوښتل چې دغه محدودیتونه لرې کړي او ښځو او نجونو ته د خپلو اساسي حقونو د ترلاسه کولو زمینه برابره کړي.
په امنیت شورا کې د ایران استازي د افغانستان په اړه په غونډه کې وویل، افغانستان باید د ترهګرۍ په خوندي پناهځای بدل نه شي او د دې هېواد خاوره باید د سیمې د هېوادونو، په ځانګړي ډول د ګاونډیو هېوادونو، د امنیت د ګواښلو او کمزوري کولو لپاره ونه کارول شي.
د ایران دیپلومات وویل چې په افغانستان کې د ترهګرو ډلو، په ځانګړې توګه د داعش خراسان څانګې، فعالیتونه لا هم د افغانستان، سیمې او نړۍ امنیت ته ګواښ پېښوي. هغه همداراز د طالبانو او پاکستان ترمنځ د زیاتېدونکو کړکېچونو په اړه اندېښنه څرګنده کړه.