تاند (سه شنبه د ثور/ غويي ۸مه) افغانستان کې د طالبانو د حکومت د بهرنیو چارو وزارت په کابل کې د پاکستان د سفارت شارژدافیر عبیدالرحمن نظاماني احضار کړی او د کونړ مرکز کې پر پوهنتون سربېره د ډیورنډ فرضي کرښې په اوږدو کې د پاکستاني ځواکونو له لوري پر ملکي موخو او عامه ځایونو د ترسره شویو بریدونو په تړاو یې خپل اعتراض لیک ور سپارلی دی.
یاد وزارت په یوه خبرپاڼه ویلي چې، بهرنیو چارو وزارت د افغانستان د هوايي حریم نقض او د ملکي وګړو پر وړاندې بریدونه په کلکه غندلي او د هېواد د ځمکنۍ بشپړتیا څرګند نقض یې د نړیوالو اصولو خلاف او پاروونکی عمل بللی دی.
طالبانو د پاکستان هغه ادعاوې چې ګواکې تاوتریخوالی د افغانستان له لورې رامنځته شوی، هم رد کړي او څرګندوي چې د وضعیت ریښې باید په دقت وڅېړل شي.
د طالبانو بهرنیو چارو وزارت یو ځل بیا ټینګار کړی چې دوی د خپلې خاورې او خلکو د دفاع مشروع حق محفوظ بولي او له پاکستاني لوري غواړي چې له ورته کړنو ډډه وکړي.
په خبرپاڼه کې یادونه شوې چې، د طالبانو بهرنیو چار وزارت پاکستاني لوري ویلي چې،د ورته بېمسوولیته کړنو دوام به ناوړه عواقب ولري.