تاند (دوشنبه، د وري/ حمل ۳۱ مه) د فرانس پریس اژانس د راپور له مخې، د پاکستان په پلازمېنه اسلام اباد کې د ایران او امریکا له دوهم پړاو خبرو مخکې امنیتي تدابیر په څرګند ډول زیات شوي دي.
د دغو خبرو لومړی پړاو د وري په ۲۲مه په همدې ښار کې ترسره شوی و، خو په پایله کې یې کومه موافقه ونه شوه.
ټرمپ ویلي چې د هغه استازي د خبرو لپاره پاکستان ته روان دي او ټاکل شوې د دوشنبې په ماښام اسلاماباد ته ورسېږي.
د ایران حکومت تر اوسه په رسمي ډول د خپلو استازو د ګډون په اړه څه نه دي ویلي.
پاکستاني چارواکو مخکې خبر ورکړی و چې په اسلاماباد او ګاونډي ښار راولپنډۍ کې لارې تړل کېږي او ترافیکي محدودیتونه لګول کېږي.
د راپور له مخې، امنیتي ځواکونه او د تلاشۍ پوستې د ښار د خوندي هوټلونو شاوخوا زیاتې شوي، په ځانګړي ډول د اسلام اباد د ماریوټ هوټل او سرینا هوټل ترڅنګ، چې د مخکینیو خبرو کوربه وو.
همداراز، د یکشنبې په ورځ د سرینا هوټل پر لور تلونکي ډېر سړکونه تړل شوي وو، او په سیمه کې اغزن تارونه، درانه سیمنټي خنډونه او د ترافیک بدیلې لارې جوړې شوې وې.