تاند (سې شنبه، د وري/ حمل ۱۸ مه) ملګري ملتونه وايي، په داسی حال کې چې په افغانستان کې د امیندوارۍ په مخنیوونکو وسایلو باندې محدودیتونه لګېدلي، امیندوارو ښځو ته د اساسي روغتیايي خدماتو لاسرسی ډېر مهم دی.
د ملګرو ملتونو د نفوس صندوق (UNFPA) د دوشنبې په ورځ وویل چې امیندواره ښځې باید بې خنډه روغتیايي خدماتو ته لاسرسی ولري، ځکه چې د میندو روغتیا د ژوند ژغورنې اړتیا ده، په تېره بیا په هغه هېواد کې چې د میندو د مړینې کچه پکې د نړۍ تر بل هر هیواد لوړه ده.
دې ادارې ټینګار وکړ چې د میندو روغتیايي خدماتو ته لاسرسی “د بحث وړ نه دی” او ویې ویل چې افغانستان لا هم د نړۍ له هغو خطرناکو ځایونو څخه دی چې امیندوارېدل پکې ډېر خطر لري.
د ملګروملتو د نفوس ادارې د معلوماتو له مخې، په افغانستان کې د هر ۱۰۰ زره ژوندیو زیږونونو په مقابل کې شاوخوا ۶۲۰ میندې مري، او نژدې په هر دوه ساعته کې یوه ښځه د امیندوارۍ د مخنیوي وړ ستونزو له امله ژوند له لاسه ورکوي.
دا خبرداری د هغو راپورونو له خپرېدو وروسته ورکړل شو چې په هرات کې د امر بالمعروف څارونکو د ولایتي زېږنتون ځینې برخې تړلې دي او روغتیايي کارکوونکو ته یې ویلي چې ښځو ته د امیندوارۍ د مخنیوي ګولۍ او کنډومونه ور نه کړي.
د دې راپورونو له خپرېدو سره د روغتیايي کارکوونکو او د حقونو د مدافعانو اندېښنې زیاتې شوې دي، ځکه وېره شته چې د میندو او تولیدي روغتیا خدمات، چې له وړاندې هم کمزوري دي، لا نور هم زیانمن شي.