تاند (پنجشنبه د کب – حوت ۱۴مه) افغانستان کې د طالبانو د ټولګټو چارو وزارت ویاند وايي، د اوسپنې پټلۍ د څلورو بندرونو له لارې تېره اونۍ ۱۲۷زره او ۶۵۰ مټریک ټنه صادرات او واردات شوي دي.
محمداشرف حق شناس زیاته کړې، چې دغه انتقالات په منظمه توګه دوام لري.
د حق شناس په وینا یاد انتقالات د حیرتان، اقينې، تورغونډۍ او خواف-هرات بندرنونو له لارې پرته له کومه خنډه شوي دي.
نوموړي نن پنجشنبه په خپلو څرګندونو کې زیاته کړې چې، له دې ډلې د حیرتان بندر له لارې ۸۸زره او ۱۸۶ ټنه، د اقینې بندر له لارې ۱۰زره او ۷۶۹ ټنه، د تورغونډۍ له لارې۱۴زره او ۱۲۳ ټنه او د خواف–هرات له لارې ۱۴زره او ۵۷۲ ټنه صادرات اوواردات شوي دي.
په دغه انتقالاتو کې نفتي، غیر نفتي او نور توکي شامل دي.
د سرچینې په وینا تېره اونۍ یې ۲۶۵ ټنه صادرات ترسره کړي چې لویه برخه یې کاني ډبرې او وچه مېوه جوړوي.
مسوولانو ډاډ ورکړی، چې له ټرانزیټي لویو لارو نه د انتقالاتو په بهیر کې سوداګرو او باوړونکو موټر چلوونکو ته مناسب او خوندي شرایط برابر کړي.
مسوولانو څو ورځې وړاندې هم ویلي وو چې، د روان ۱۴۰۴کال په تېرو ۱۱ میاشتو کې د تېرکال د ورته مودې پرتله د اوسپنې پټلۍ له لارې په انتقالاتو کې ۳۳.۳ سلنه زیاتوالی راغلی.
دوی زیاته کړې وه، چې په همدې موده کې یې بېلابېلو هېوادونو ته ۷۱زره ټنه سوداګریز توکي صادر کړي.