تاند (شنبه د کب – حوت ۹مه) د طالبانو حکومت د محمد محقق اړوند رسنۍ «راه فردا» خپرونې بندې کړې.
سرچینې ویلي چې، طالبانو د یاد ټلوېزیون د خپرونو د بندولو تصمیم ځکه نیولی چې محمد محقق د پاکستاني پوځي رژیم لخوا پر ملکي افغانانو بمبار جایز بللی دی.
محقق د پاکستان پر وړاندې د طالبانو غچاخیستونکي عملیات غندلي و.
د سرچینې په وینا: «محمد محقق د نورو په لمسون د افغانستان ملي يووالی ګواښه؛ نو ځکه اړينه وه چې هغه ته د منسوبې رسنۍ خپرونې بندې شي.»
د یادې رسنۍ مسوولانو او محمد محقق تر اوسه په دې اړه څه نه دي ويلي.