تاند (شنبه، د کب/ حوت ۲ مه) د یونان د کډوالو چارو وزارت ویلي چې دا هېواد له جرمني، هالنډ، اتریش او دنمارک سره د دې لپاره همکاري کوي چې له اتحادیه اروپا څخه بهر د کډوالو لپاره د «بېرته ستنولو مرکزونه» جوړ کړي؛ داسې مرکزونه چې ښايي په افریقا کې رامنځته شي.
د یونان د مهاجرت وزیر، تانوس پلوریس، ویلي چې دا مرکزونه به هغو کسانو ته ځانګړي وي چې د پناه غوښتنه یې رد شوې وي او د هغوی اصلي هېوادونه یې بېرته منلو ته چمتو نه وي.
هغه ټینګار وکړ چې یادو پنځو هېوادونو لا له وړاندې په دې اړه لیدنې – کتنې کړې دي او ټاکل شوې ده چې تخنیکي ډلې راتلونکې اوونۍ غونډه وکړي.
پلوریس وویل: «موږ نور یوازې په نظري کچه خبرې نه کوو، بلکې په عملي ډول اقدام ته داخل شوي یوو.»
نوموړي دا روښانه نه کړه چې کوم هېوادونه به د دغو مرکزونو کوربانه وي، خو زیاته یې کړه چې د افریقا ټاکنه «حتمي نه ده» او دا چې لوی اروپايي هېوادونه به په مستقیم ډول له احتمالي کوربه دولتونو سره خبرې وکړي.
د یونان د کډوالو وزیر د دې ډول مرکزونو جوړېدا د هغو کسانو لپاره یو مخنیوونکی اقدام وباله چې د پناه اخیستو لږ چانس لري.
د هغه په وینا، موخه دا ده چې په راتلونکو څو میاشتو کې د دې طرحې یو لومړنی چوکاټ چمتو شي، خو د دغو مرکزونو د پرانیستې کره نېټه لا تر اوسه نه ده څرګنده شوې.
یونان چې د اروپا په جنوب ختیځ کې موقعیت لري، له یوې لسیزې څخه زیات وخت کېږي چې له منځني ختیځ، افریقا او اسیا څخه د کډوالو او پناه غوښتونکو لپاره اروپايي اتحادیې ته د ننوتلو له مهمو لارو څخه ګڼل کېږي.