تاند ( پنج شنبه د سلواغې ـ دلوې ۹مه) د ننګرهار ولایت د رسنیو دفتر د خبرپاڼې له مخې دغه پېښه د مرکز جلال اباد د اوومې ناحيې اړوند د مرکزي غوچکو په سيمه کې تېره شپه شاوخوا ۱۲ بجې رامنځته شوې ده.
خبرپاڼه کاږې چې، د استوګنې دغه کور د نړېدو پېښه کې د دې کورنۍ يوه مور او شپږ ماشومان مړه او پلار يې ژوبل شوی دی.
د سرچینې د مالوماتو پر اساس دغه دوه پوړيز کور، چې د نهر ترڅنګ جوړ شوی وو، تر دې وړاندې هم د اوبو له امله زيان لیدلی وو.
سرچینه وایي، پېښې سره سم امنيتي مسئولان رسيدلي، جسدونه يې له خاورو ويستلي او عدلي طب ته يې لېږدولی، چې نن به يې د تکفين او تدفين مراسم ترسره شي.
په خبرپاڼه کې، ننګرهار کې د طالبانو والي ملا محمد نعيم اخند هم په ياده پېښه خواشيني ښودلې او همدا راز يې اړونده ادارو ته يادې کورنۍ سره د مرستې او ملاتړ سپارښتنې کړي دي.