تاند ( سه شنبه د سلواغې ـ دلوې ۷مه) د افغانستان برېښنا شرکت وایي، د سالنګ لارو بندښت او سخت اقلیمي شرایط د وارداتي برېښنا د لېږد مزي د بیا نښلولو چارې له ننګونو سره مخ کړې دي.
د دغه شرکت په وینا، د روانې سلواغې میاشتې پر ۲مه د شمالي سالنګ په شاول سیمه کې د ۲۲۰ کیلوولټ برېښنا یوه پایه د درنو واورو او واورې راښوېیدو له امله چپه شوې او یو سرکټ یې پرې شوی دی.
برېښنا شرکت زیاتوي چې د اړوندو ادارو په همغږۍ هڅې روانې دي څو تخنیکي ټیم سیمې ته ورسېږي او د ترمیم چارې ژر تر ژره بشپړې کړي.
له تېرې یوې اونۍ راهیسې د کابل په ګډون د افغانستان په یو شمېر ولایتونو کې خلک د برېښنا له کمښته شکایت لري.
خلک تمه لري چې، حکومت باید د دا ډول ستونزو د حل بېړنی ظرفیت ولري خو د خلکو په وینا افغانان لا هم دا کړاو ګالي.
تازه د ملګرو ملتونو پراختیايي پروګرام وايي چې د افغانستان ۸۰ سلنه وګړي تلپاتې برېښنا ته لاسرسی نه لري.
یاد پروګرام په تازه راپور کې لیکلي چې افغانستان د انرژۍ له کمښت سره مخ دی.