تاند (دوشنبه، د سلواغې/ دلوې ۶) د ایران د ملي امنیت د عالي شورا د سرمنشي علي لاریجاني لور د امریکا په یوه پوهنتون کې له دندې وایستل شوه.
امریکا لس ورځې وړاندې لاریجاني د بندیزونو په لیست کې شامل کړ.
د ده لور فاطمه اردشېر لاریجاني د جورجیا ایالت د ایماري پوهنتون د «وبنشیپ» د سرطان په انتستیتیوت کې د استادې په توګه کار کاوه.
د روانې اوونۍ په پیل کې، له جورجیا ایالت څخه د امریکا د کانګرس غړي بادي کارتر غوښتنه وکړه چې هغه له دندې ګوښه شي او په جورجیا کې دې د هغې طبي جواز هم لغوه شي.
کارتر د جورجیا پوهنتون او د دې ایالت طبي شورا ته په یوه لیک کې ولیکل چې علي لاریجاني، چې په ایران کې لوړپوړی امنیتي مقام دی، په وروستیو کې په ښکاره ډول د امریکایانو او د امریکا د متحدانو پر ضد د تاوتریخوالي ملاتړ کړی دی.
بادي کارتر زیاته کړه چې د لاریجاني د لور له خوا په امریکا کې د ناروغانو د درملنې دوام د منلو نه دی.
I wrote a letter to Emory and the Georgia Composite Medical Board demanding Dr. Fatemeh Ardeshir-Larijani’s removal and the revocation of her medical license.
Her father, Ali Larijani, is a senior official of the Islamic Republic of Iran who openly calls for violence against… pic.twitter.com/DOBfVXnd24
— Buddy Carter (@RepBuddyCarter) January 22, 2026
هغه دا هم وویل چې « داسې کس ته، چې له یوه لوړپوړي ایراني امنیتي مقام سره نژدې کورنۍ اړیکې لري، د طبي جواز ورکول او په داسې حساس مقام کې یې کار کول د ناروغانو پر باور، د بنسټونو پر خوندیتوب او د ملي امنیت لپاره خطرونه رامنځته کوي.»
په همدې وخت کې، یو شمېر امریکایانو او ایرانیانو په ټولنیزو رسنیو کې کمپاین پیل کړ او د هغې د ګوښه کېدو غوښتنه یې وکړه. همداراز یو شمېر ایرانیانو د وینشیپ د سرطان انسټیټیوټ مخې ته لاریون وکړ او د لاریجاني د لور د ګوښه کېدو غوښتنه یې وکړه، ځکه د دوی په وینا د هغې پلار په ایران کې د اعتراضونو په ځپلو کې رول درلود.
فاطمه لاریجاني د ایماري پوهنتون د طب پوهنځي د وینېپېژندنې او طبي انکولوژۍ د څانګې اسستانته وه، او د پوهنتون رسمي وېبسایټ د هغې څېړنې داسې بیان کړې وې چې د «سږو د سرطان لپاره د نوو درملیزو هدفونو موندل او د معافیتي مقاومت د میکانیزمونو پېژندنه» یې تمرکز و.
خو د شنبې په ورځ له دندې تر ګوښه کېدو وروسته، د هغې ژوندلیک نور د پوهنتون پر وېبپاڼه نه ښکاري.