تاند ( سه شنبه د مرغومي ـ جدي ۳۰مه) د ټېکټاک کمپنۍ وايي، د ۲۰۲۵کال له جولای څخه تر سېپتمبر میاشت پورې یې د ټولنیزو لارښوونو د سرغړونې له امله د پاکستاني کاروونکو تر ۲۸مېلیونه ډېرې ویډیوګانې ډیلېټکړې دي.
د راپورونو له مخې؛ ۹۵٫۹سلنه دغه ویډیوګانې تر پورته کېدو وروسته له ۲۴ساعتونو څخه په کمه موده کې لرې شوې دي.
دغه شمېره د جولای څخه تر سپتمبر میاشتې پورې ثبت شوې ده.
یادې کمپنۍ ویلي چې، دغه راپور د یادې شبکې ژمنتیا ښيي چې کاروونکو ته خوندي ډیجیټلي چاپېریال برابر کړي.
دوی زیاتوي چې د سرغړونکې منځپانګې د پېژندلو او ړنګولو لپاره اصول لري او په عملي ډولکارول کېږي.
د مالوماتو له مخې ټېکټاک دنړۍ په کچه په یاده موده کې ټولټال ۲۰۴مېلیونه، ۵۳۴زره او ۹۳۲ ویډیوګانې ړنګې کړې دي.
دغه شمېره د دې شبکې د ټولو پورته شوو منځپانګو شاوخوا ۰٫۷ سلنه جوړوي.
له دې ډلې ۱۸۶ مېلیونه، ۶۰۸زره او ۸۱ ویډیوګانې د اتومات پېژندنې ټېکنالوژۍ له لارې ړنګې شوې دي.