تاند (چهارشنبه، د لړم/ عقرب ۱۴مه) د افغانستان د شمال په زلزله ځپلو سیمو کې چارواکو د سېشنبې په ورځ اعلان وکړ چې د ژغورنې عملیات پای ته رسېدلي دي.
د دې زلزلې له امله یې لږ تر لږه ۲۷ تنه مړه او ۹۵۶ تنه ټپیان شوي دي.
د افغانستان د سره میاشت ټولنې په وینا، تر زرو زیات کورونه په دې زلزله کې وران شوي دي.
زلزله د دوشنبې په سهار د سیمې په وخت شاوخوا د ۱ بجې (د یکشنبې په ۲۰:۳۰ GMT) د افغانستان په شمالي ولایتونو، لکه بلخ، سمنګان، سرپل، بغلان او کندوز کې زیاته احساس شوه.
ډېری مرګژوبله په سمنګان او بلخ ولایتونو کې ثبت شوې ده. د افغانستان سره میاشت ټولنې ویلي چې دا زلزله د «درنو بشري تلفاتو او سترو مالي زیانونو» سبب شوې او ټولټال یې ۱٬۰۳۷ کورونه زیانمن کړي دي.
د لټون او ژغورنې عملیات پای ته رسېدلي، خو بیړنۍ مرستندویې چارې لا هم روانې دي.
د امریکا د جیالوجیکي سروې د ادارې په وینا، د دې زلزلې مرکز د مزارشریف ښار ته نژدې د مځکې له سطحې ۲۸ کیلومتره (۱۷.۴ میله) لاندې و.
د ولایتونو له مخې د تلفاتو شمېر داسې دی:
- سمنګان: ۱۳ تنه مړه او ۴۱۸ ټپیان
- بلخ: ۱۲ تنه مړه او ۴۳۵ ټپیان
- بغلان: ۱ تن مړ او ۱۹ ټپیان
- کندوز: ۶۵ ټپیان
- جوزجان: ۳ ټپیان
- سرپل: ۱ مړی او ۱۶ ټپیان
د عامې روغتیا وزارت تایید کړې چې ټپیان د هېواد په بېلابېلو روغتونونو کې تر درملنې لاندې دي.