تاند (شنبه د لړم ـ عقرب ۱۰مه) طالبان وايي، د تورخم دروازه نن شنبه، یوازې هېواد ته د افغان کډوالو د راستنېدو لپاره پرانیستل شوه.
د معلوماتو له مخې، د تورخم دروازې پورې غاړې سلګونه په کډو بار موټر ولاړ وو، چې له سختو ستونزو سره مخ دي.
دا دروازه وروسته له هغې پرانیستل کېږي، چې اسلام آباد کې د طالبانو سفیر کډوالو سره د پاکستان پر نامناسب چلند نیوکه وکړه.
هغه ویلي وو، په تېرو څو ورځو کې ۱۰ زره کډوال نیول شوي او د ستنولو مرکزونو ته وړل شوي او یا پر سړکونو هېواد ته د اوښتلو لپاره شپې ورځې تېروي.
تورخم شاوخوا درې اوونۍ وړاندې پاکستاني لوري طالبانو سره د جګړې وروسته د هر ډول تګ راتګ لپاره تړلی دی.