تاند (شنبه د لړم ـ عقرب ۱۰مه) د ایران د بشري حقونو سازمان «هه نګاو» ویلي، د ایران حکومت د دوو افغانانو په ګډون ۹ زندانیان اعدام کړي دي.
د راپور له مخې، د اعدام شویو افغانانو هویت نه دی څرګند شوی، خو د ځینو تورونو له امله د ایران کرج ښار کې اعدام شوي دي.
دغه راز، څو نور کسان هم د مختلفو جرمونو لکه «قصدي قتل» او «د مخدره موادو قاچاق» په تور د ایران په بېلابېلو زندانونو کې اعدام شوي دي.
هه نګاو ویلي، د ایران قضايي ادارو دا ادعدامونه نه دي خپاره کړي او اندېښنه یې څرګنده کړې، چې دغه هېواد کې افغان کډوال او بندیان له مدافع وکیل پرته محاکمه کېږي.
د دغه سازمان د معلوماتو له مخې، له روان کال راهیسې لږ تر لږه ۶۰ افغانان په ایران کې اعدام شوي دي.
د طالبانو حکومت تر اوسه د دغو اعدام شوو افغانانو په تړاو غبرګون نه دی ښودلی.