تاند(یکشنبه. د تلې/میزان ۶مه) پاکستاني رسني د امنیتي سرچینو په وینا وايي، د داعش-خراسان ډلې یو مشر قوماندان محمد احساني، چې په انور مشهور و، د یکشنبې په ورځ د افغانستان په مزار شریف ښار کې وژل شوی دی.
احساني په پاکستان کې د تروریستي فعالیتونو په اسانتیا کې مهم رول درلود. هغه د تاجکستاني ځانمرګو بریدګرو د روزنې او له ډیورند کرښې د اړولو مسوول و، څو هلته بریدونه وکړي.
سرچینې زیاتوي چې هغه د پېښور د کوچه رسالدار د ۲۰۲۲ د خونړي برید اصلي همغږوونکی هم و، چې پکې ۶۷ تنه وژل شوي وو.
د پاکستان بیلابیلو رسنیو د احساني د وژل کېدو خبر خپور کړی خو هیڅ یوې نه دي ویلي چې نوموړي څنګه او د چا له لوري وژل شوی دی.
په افغانستان کې د طالبانو حکومت تراوسه پورې په دې اړه څه نه دي ویلي.
د ټولو رسنیو د خبر الفاظ ورته دي. او هیڅ رسنۍ د احساني په اړه تر دې زیات څه نه دي خپاره کړي. خو ټولو د خبر په دوام کې لیکلي:
پاکستان له هغه وخت راهیسې چې طالبان په ۲۰۲۱ کې بیا په افغانستان کې واکمن شول، د پولې هاخوا ترهګریزو پېښو کې د پام وړ زیاتوالی لیدلی دی، په ځانګړې توګه په خیبر پښتونخوا او بلوچستان کې.
یوازې د اګست په میاشت کې د ترهګریزو پېښو کچه د جولای په پرتله ۷۴ سلنه لوړه شوې ده. د اسلاماباد مېشت د جګړې او امنیت د مطالعاتو انسټیټیوټ (PICSS) د راپور له مخې، په همدې میاشت کې ۱۹۴ کسان د وسلهوالو بریدونو له امله وژل شوي دي.
پاکستان، چین، ایران او روسیې د افغانستان په خاوره کې د ترهګرو ډلو پر موجودیت ژوره اندېښنه څرګنده کړې ده، چې پکې القاعده، د بندیز لاندې تحریک طالبان پاکستان (TTP)، د بلوچستان د ازادۍ پوځ (BLA) او ورته نورې ډلې شاملې دي.
دغه څلور هېوادونه د افغانستان په اړه د خپل څلور اړخیز چوکاټ د څلورمې غونډې وروسته، چې د ملګرو ملتونو د عمومي اسمبلۍ د ۸۰مې غونډې په څنډه کې د جمعې په ورځ د روسیې په کوربتوب ترسره شوه، یوه ګډه اعلامیه خپره کړه.
هغوی له افغان چارواکو وغوښتل چې د ترهګرو ډلو پر وړاندې “اغېزمن، عملي او د باور وړ اقدامات” وکړي، د روزنې مرکزونه له منځه یوسي، د مالي سرچینو مخه ونیسي، د غړو جلب او د وسلو لاسرسی بند کړي.
دغه څلور لوري همدارنګه ټینګار کوي چې د افغانستان خاوره باید د ګاونډیانو او یا نورو پر ضد ونه کارول شي، او باید ټولې ترهګرې ډلې پرته له توپیره له منځه یووړل شي.