تاند ( پنجشنبه د وږي ـ سنبلې ۲۰مه) د امریکا د خارجه چارو وزارت د طالبانو حکومت په تېر ۲۰۲۴ کال کې په افغانستان کې د بشري حقونو پر وړاندې پر پراخو سرغړونو تورن کړ.
یاد وزارت په یوه تازه راپور کې ویلي، چې د طالبانو تر حاکمیت لاندې د افغان ښځو پر بنسټیزو حقونو سخت بندیزونه لګېدلي او دوی یې له ټولو حقونو بې برخې کړې دي.
سرچینې دغه راز طالبان د نورو سرغړونو سربېره د بیان او رسنیو پر ازادۍ پراخو بندیزونو، ځان وژنې، جبري تښتونې، ربړونې، په وسلوالو جګړو کې د ماشومانو پر کارولو او پر پراخ انساني قاچاق هم تورن کړي دي.
راپور کې زیاته شوې چې طالبانو انټرنېټ ته د خلکو لاسرسی محدود کړی او ګڼ خبریالان یې ګواښلي او د دوی د تاوتریخوالي له امله ځېنې رسنۍ تړل شوې او ډېری خبریالان له هېواده وتلو ته اړ او بې دندو شوي دي.
امریکا همدا راز د طالبانو دا تګلاره او کړنې په سختو ټکو غندلې.
سرچینې ډاډ ورکړی چې، دوی به د افغانانو ترڅنګ ولاړ وي؛ ترڅو دوی وکولی شي خپلو بنسټیزو حقونو، ولسواکۍ او ازادۍ لپاره مبارزه وکړي.
وروسته له هغه چې د ۲۰۲۱ کال د اګست پر ۱۵ جمهوري نظام وپرځېد او د طالبانو نظام افغانستان تر خپلې ولکې لاندې ونیوه لسګونه زره ښځې له دولتي ادارو لرې او پرځای یې طالبان وګومارل شول.
ورسره هممهاله د تېر جمهوریت کارکوونکي په یوه او بله پلمه په کور او بې دندې کړل چې، دې چارې افغانستان کې د بېکارۍ کچه لوړه او خلک له سختو اقتصادي مشکلاتو سره مخ کړل.
پرون چهارشنبه د ځان وژنې د مخنیوي نړیواله ورځ وه، خو د راپورونو له مخې افغانستان کې د طالبانو له لوري د لګېدلو سختو محدودیتونو او بېکارۍ له امله د ځان وژنې پېښې زیاتې شوي دي.