تاند (شنبه، د سنبلې لومړۍ) د جمعې په ماښام هالنډ کې د پیوستون ټولنې په نوښت او د غرغښت ټولنې په همکارۍ د افغانستان د خپلواکۍ ۱۰۶ کلیزه په شاندارو مراسمو سره ولمانځل شوه.
پروګرام د قران کریم په تلاوت او د ملي سرود په غږېدو پیل شو او ورپسې د پیوستون ټولنې په استازيتوب ډاکټر عرفان نوروینا وکړه.
نوموړي د خپلواکۍ ارزښت ته په اشارې وویل چې ددې ورځې لمانځل یوازې یو تاریخي یاد نه، بلکې د ملي هویت او یووالي د بیا ژوندي کولو هڅه ده.
تاریخي او ټولنیز بحث
د پرانیستونکې وینا وروسته د افغانستان د خپلواکۍ د تاریخي او کلتوري اړخونو تر څنګ د کډوالو پر ونډې هم تفصیلي بحث وشو.
په دې برخه کې تاریخپوه ډاکټر قدرت الله علیخیل، د کلتوري چارو فعاله شهنازه شاه او ټولنیز فعال محمد اسماعیل وزیري ګډون درلود.
ګډونوالو په خپلو څرګندونو کې د خپلواکۍ مبارزې، د ښځو رول، او د افغان کډوالو د ونډې اړوند مهم ټکي روښانه کړل.
ځوانان او مشاعره
پروګرام ته د ځانګړې خوږې فضا ورکولو لپاره د پیوستون ټولنې د ځوانانو (ستوري) برخه هم پرانیستل شوه، چې پکې ځوانانو د خپلې ژمنې او ملي احساس په اړه خبرې وکړې. وروسته د ادب مینه والو لپاره مشاعرې و شوه، چې ګڼو شاعرانو پکې خپل شعرونه برخوالو ته واورول.
ټنګ ټکور او هنري برخه
د پروګرام په وروستۍ برخه کې د ټنګ ټکور محفل جوړ شو. د افغان هنرمندانو ګلورین باچا او زبیر نېکبین په زړه پورې سندرې وویلې چې د ګډونوالو له تود هرکلي سره مخ شوې.
د پیوستون ټولنې دریځ
د پیوستون ټولنې مشر خېبر وصال وایي:
“د افغانستان د ارزښتونو او ملي ورځو لمانځل او د هغو ورپیژندل ځوان نسل ته د پیوستون ټولنې له اساسي موخو څخه دي.
موږ به په راتلونکي کې هم د داسې فرهنګي او ټولنیزو پروګرامونو د جوړولو لپاره هڅې جاري ساتو.”
دغه مراسم د ګډونوالو په خوښۍ ، ملي اتڼونو او ملي احساس سره د شپې ناوخته پای ته ورسیدل.