تاند (دوشنبه، د زمري/ اسد ۶ مه) د کندهار ولایت د اطلاعاتو او کلتور ریاست د یکشنبې په ورځ وویل چې افغان پولیسو د ۲۴۰۰ مېږو د قاچاق هڅه شنډه کړې ده.
قاچاقبرو غوښتل چې پسونه له کندهار ولایت څخه ګاونډي هېواد ته قاچاق کړي.
د ریاست په وینا، قاچاقبرانو هڅه کوله چې دغه څاروي د سپین بولدک ولسوالۍ له لارې په غیرقانوني ډول انتقال کړي. د پېښې په تړاو څو کسان نیول شوي دي.
دا په داسې حال کې ده چې څه موده وړاندې، افغان پولیسو له بدخشان ولایت څخه ګاونډي هېواد تاجکستان ته د ۵۰۰ مېږو د قاچاق مخه نیولې وه.
د څارویو قاچاق کوونکي وخت ناوخت هڅه کوي چې د افغانستان له پولو د ګټې په موخه څاروي وباسي، خو امنیتي ځواکونه د ناقانونه سرحدي سوداګرۍ د مخنیوي په موخه دا ډول هڅې خنثی کوي.
دغه یې ډیر ښه کار کړی هغه کس د نور جریمه هم کړي سي تور دجال ته یې د خرڅلاو لپاره وړي 👍