تاند【دوشنبه د ثور ـ غویي ۲۲مه】د افغانستان او ازبکستان د خصوصي سکټور ترمنځ د ۵۰ ملیونه ډالرو په ارزښت ۳۰سوداګریز هوکړهې لاسلیک شوې.
دغه هوکړهې د دواړو هېوادونو د سوداګریزو اړیکو د تواصل په اړه د یوې غونډې په ترڅ کې لاسلیک شوې.
د افغانستان د صنعت او سوداګرۍ وزارت مرستیال احمدالله زاهد وایي، چې د سوداګرۍ خنډونه باید حل او ازبکستان ته افغان صادرات زیات شي.
له دې سره هم مهاله ازبکستان یوه کرنیزه مرستندویه کڅوړه د بلخ ولایت په حیرتان بندر کې د طالبانو د کرنې، اوبو لګولو او مالدارۍ وزارت مسوولینو ته وسپارله.
په دغه مرسته کې ۲۰ ټنه د شولو، ۵ ټنه د پنبې او ۱.۳ ټنه د سبو تخمونه شامل دي.
دغه مرسته د جوزجان، کندوز، تخار، بلخ، سمنګان او بغلان ولایتونو کرنې ریاستونو ته لېږل شوي دي.
د طالبانو کرنې وزارت ویلي، چې ازبکستان به په نږدې راتلونکي کې له افغانستان سره د کرنیزو وسایلو او ماشینونو مرسته هم وکړي.