تاند 【یکشنبه د مرغومي ـ جدي ۳۰مه】بامیانو ولایت کې د طالبانو ځایي چارواکي وایي،چې په دغه ولایت کې د درنې واورې د ورېدو له امله د کابل ـ بامیان، بامیان ـ غور او بامیان ـ دایکندي لویې لارې د تګ راتګ پرمخ تړلې دي.
طالب مسوولین زیاتوي، چې د غور پر لار شاتو کوتل او له دایکندي سره پر پوله قوناق کوتل هم د واورې ورېدو له کبله تړل شوي دي.
تر دې وړاندې په دایکندي کې د طالبانو د والي رسنیز دفتر هم په یوه خبرپانه کې ویلي چې د درنې واورې له کبله د بامیان ـ دایکندي لار په قوناق کوتل کې د تګراتګ پرمخ بنده شوې ده.
دا لارې داسې مهال بندېږي،چې نن هم د هېواد په ۲۹ ولایتونو کې د باران او واورې د ورېدو وړاندوینه شوې ده.
د یادونې ده، چې پرون شنبه د مرغومي ۲۹مه د ترانسپورت او هوایي چلند ادارې د سالنګونو د تړل کېدو خبر ورکړی وو.
یادې ادارې ویلي وو،چې د سالنګ لویه لار د زیاتې واورې د ورېدو له امله تړل شوې ده.