تاند ( دوشنبه د مرغومي ـ جدي ۱۰مه) د طالبانو حکومت د امنیت شورا وروستۍ ناستې ته په غبرګون کې وایي، چې د دوی د استازي له حضور پرته د افغانستان په تړاو د ملګرو ملتونو د امنیت شورا ناستې یو اړخیزه او بېګټې دي.
د طالبانو د حکومت مرستیال ویاند حمدالله فطرت وايي، تر هغې چې د دوی استازی د افغانستان په تړاو ناستو کې د خپلو حقونو او مشروع غوښتنو د دفاع لپاره حضور ونه لري، دا ډول ناستې به بې پایلې وي.
نوموړی ټینګار کوي، چې په دې ناستو کې باید له نړۍ سره د افغانستان د نښلولو، بندیزونو لرې کولو او د افغانستان د شتمنیو د ازادولو په تړاو خبرې وشي.
فطرت داسې مهال دا غبرګون ښیي، چې ملګرو ملتونو امنیت شورا د تېرې شنبې په ورځ په یوه خبرپاڼه کې د طالبانو له حکومته غوښتي، چې ترهګرۍ سره د مبارزې هڅو د پیاوړتیا لپاره اغېزناک ګامونه پورته کړي.
دوی دغه راز د افغانستان لپاره د سیاسي لارې پر یوې نقشې ټینګار کړی او د طالبانو د حکومت د “امر بالمعروف او نهې عن المنکر وزارت” د قانون او طبي انسټیټیوټونو کې یې د نجونو د ښوونیز بهیر ځنډولو په تړاو د وروستۍ پرېکړې د لغوه کولو غوښتنه کړې ده.
د بشري، اقتصادي، ټولنیزو، پراختیایي، امنیتي، نشه یي توکو، خبرو او تعامل، حکومتولۍ، د قانون واکمنۍ، بشري حقونو په ځانګړې توګه د ښځو او نجونو حقونو په ګډون د افغانستان څو اړخیزو ننګونو ته رسېدنه د امنیت شورا نورې غوښتنې دي.
د ملګرو ملتونو منشور یا اساسنامه یو اجتماعي قرارداد ( تړون ) دی . په دې منشور کې یو شمېرنړیوال قوانین ، حقوق ، مکلفیتونه او وجایب ځای پرځای شویدي ، چې ټول غړی هېوادونه د هغو پر اجرا مکلف دي .
البته ځینې هېوادونه یواځې د هغوی هغه برخه مني ، چې د دوی په ګټه وي او د وجایبو له سرته رسولو نه په یو ډول نه یوډول ځان خلاصوي . لکه د نورو په کورنیو چارو کې نه مداخله او ټول مسایل د خبرو له لارې حل کول.
افغانستان هم له 1946 کال راپدېخوا د دغه نړیوال سازمان غړی دی . خو متاسفانه له 2021 نه تراوسه د افغانستان دولت په دې سازمان کې قانوني استازی نه لري .
د دوکتور محمد اشرف غني په مشرۍ جمهوري نظام سقوط کړی او پرځای یې د طالبانو « امارت » په افغانستان واکمن شویدی ، خو تراوسه د هغوی نظام د هغو کړنو له امله چې د افغانستان خلکو ، اسلامي سازمان ، اسلامي هېوادونو او د نړیوالو سازمانونو ته د منلو نه دي ، چا په رسمیت نه دي پېژندلي . طالبانو ته د افغانستان د ګټو پرځای د خپل تحریک پالیسي ، غوښتنې او ګټې مهمې دي ، بنا دا وړۍ به هم شړۍ نه شي .
کله نا کله د پنجاب استازی په مستقیم ډول د افغانستان استازیتوب کوي . نصیر احمد فایق د پخواني جمهوري رژیم استازی لا پرخپله څوکۍ ناست دی او ځان د افغانستان سرپرست استازی بولي . هغه هېڅکله هم د افغانستان له ګټو دفاع نه ده کړې او لا د خپل ولس پرضد ویناوې کوي . که پنجابیان د افغانستان پرخاوره علني تعرض کوي ، د اعتراض او شکایت مرجع نشته . بنا افغانانو الله تعالی مو مرستندوی او مل شه!