تاند (یکشنبه، د لیندۍ/ قوس ۱۸ مه) په داسې حال کې چې د سوریې د حکومت مخالف وسله وال په چټکۍ سره دمشق ته نژدې کېږي، “پنځه امریکايي چارواکو” سيایناین ته ویلي چې امکان لري د بشار اسد رژیم په راتلونکو څو ورځو کې سقوط وکړي.
دغو امریکايي چارواکو، چې نومونه یې نه دي اخیستل شوي، ویلي چې لا هم د اسد د برخلیک په اړه رسمي اجماع نه ده ترلاسه شوې. دا معلومه نه ده چې آیا د هغه “سیاسي مرګ” به حتمي وي که نه، خو دا سناریو ممکن ښکاري.
یوه امریکايي چارواکي ویلي، امکان شته چې تر راتلونکې اوونۍ پورې د بشار اسد رژیم هره هغه نښه چې د ځواک څرګندونه کوي، له لاسه ورکړي: “یوازینۍ لاره چې د یاغیانو پرمختګ وځنډوي، دا ده چې یوه ښه تنظیم شوې کودتا وشي او د سوریې پوځي ځواکونه بیا جوړ شي. خو د بشار اسد ځواکونو د هر بالقوه سیال د ظهور مخه نیولې ده.”
په دې اړه، د سوریې د بشري حقونو د څار مشر، رامي عبدالرحمن، د شنبې په ورځ د جرمني خبري اژانس ته وویل چې د هغه په باور، د دمشق نیول او د بشار اسد د حکومت سقوط یوازې د وخت مسله ده.
سيایناین: په دمشق کې د بشار الاسد هیڅ نښه نشته
سيایناین تلویزیون د شنبې په ورځ د یوې “باخبرې سرچینې” له قوله راپور ورکړ چې د سوریې په پلازمېنه دمشق کې، د ولسمشر بشار اسد هیڅ نښه نه لیدل کېږي.
دا په داسې حال کې ده چې د سوریې د ولسمشرۍ دفتر ادعا کړې چې ښاغلی اسد له پلازمېنې څخه نه دی تښتېدلی او خپلې ورځنۍ چارې ترسره کوي.
د سوریې له وضعیت څخه یوې خبرې سرچینې، سيایناین ته ویلي چې بشار اسد د ښار په هغو ځایونو کې نه دی چې فکر کېږي هلته به وي.
دې سرچینې زیاته کړه چې د ولسمشرۍ ګارد نور په هغه ځای کې نه دی موجود چې هغه عموماً هلته اوسېده، ځکه که هغه په دمشق کې کوم ځای کې موجود وای، د ولسمشرۍ ګارد به هلته وای. دا حالت دا اوازې لا پیاوړې کړي چې ښایي هغه له دمشق څخه تښتېدلی وي.
د دې سرچینې په وینا، یاغي ځواکونه لا هم د اسد د موقعیت په اړه کره معلومات نه لري او د هغه د موندلو هڅو ته دوام ورکوي.
له دې مخکې، د وال سټریټ په شمول ژورنال ځینې رسنیوراپور ورکړی وو چې د بشار اسد مېرمن اسماء اسد د تېرو اوونیو په ترڅ کې له خپلو درېیو ماشومانو سره روسیې ته پناه وړې ده. د راپور له مخې، د اسد دوه ناسکه وروڼه هم متحده عربي اماراتو ته تښتېدلي دي.
د سوریې پوځ وايي چې د دمشق شاوخوا دفاعي لیکي پیاوړي کوي
د سوریې پوځ وايي چې د دمشق په شاوخوا کې په ځینو سیمو کې خپلې دفاعي لیکې پیاوړې کوي.
د سوریې د پوځ او وسلهوالو ځواکونو د عمومي قوماندې ویاند د شنبې په ورځ په یوه تلویزیوني بیان کې وویل: “وسلهوالې قطعې د دمشق په شاوخوا او جنوبي سیمه کې خپلې لیکې پیاوړې کوي.”
هغه همداراز څرګنده کړه چې پوځ د حماه او حمص په شاوخوا کې، چې د سوریې په مرکز کې موقعیت لري، او د درعا په شمالي لمنه کې، چې په جنوب کې ده، د یاغیانو پر ضد څو عملیات پیل کړي دي.