تاند (شنبه، د عقرب ۵ مه) فرید بشارت برازیلي ویکتور هوګو ته په نړیوال سازمان “یو ایف سي” کې ماتې ورکړه.
د ازادې مبارزې افغان لوبغاړي فرید بشارت، چې په بریتانیا کې اوسي، نن شپه د عقرب په پنځمه د برازیل له ویکتور هوګو سره په “یو ایف سي” سازمان کې په قفس کې مخامخ شو او دا سیال یې د نمرو په توپیر مات کړ.
د دوی مسابقه په نړیوال سازمان “یو ایف سي” کې د متحده عربي اماراتو په ابوظبي ښار کې په اتحاد سالون کې، چې ۱۸ زره نندارچیان پکې ځايږي، په درېیو پړاوونو کې ترسره شوه. بشارت د ټولو حکمانو د رایو په اتفاق ګټونکی وپېژندل شو او په دې سره یې په مسلکي آزادو مبارزو کې خپلې بریاوې ۱۳ ته ورسولې.
ویکتور هوګو، چې د برازیل دی او ۲۵ بریاوې او ۴ ماتې لري، په دې مسابقه کې خپله پنځمه ماتې تجربه کړه. د دوی مبارزه د ۶۵ کیلوګرامه وزن په کتګورۍ کې وه.
فرید بشارت په دې بري په په نړیوال سازمان “یو ایف سي” کې خپلې بریاوې ۴ ته ورسولې، او تر اوسه یې هېڅ ماتې نه ده کړې.
نن شپه په دې سازمان کې څو نورې مهمې سیالۍ هم ترسره کېږي، چې په مرکزي سیالۍ کې د ۶۵ کیلوګرامه وزن د قهرمانۍ کمربند لپاره د امریکا “مکس هالووې” د ګورجستان له “ایلیا توپوریا” سره مقابله کوي او روسي الاصله حمزه چیماییف د متحده عربي اماراتو تر بیرغ لاندې د استرالیا له روبرت وایتیکر سره سیالي کوي.
دوه دری ساعته مخکی لږ وږی او د ورور کور ته ولاړم هلته می یوه ګوله ډوډی وخوړه. وراره می چی یو ګُلالی ځوان دی د تلویزیون له لیاری ددې ورزش ننداره کوله، زه ئی هم په څنګ کی کیناستم او دا لومړی ځل ؤ چی دا ډول وحشی ورزشی مسابقه می ولیده. وراره ته می وویل چی بچیه ددې مسابقې تر سره کول لا څه چی حتی ننداره ئې هم د انسانی کرامت خلاف کار دی، هغه را ته وویل ولی؟ ور ته می وویل چی دا ډول ورزش د غربی استعمارګرانو لخوا اختراع سوې یوه روحی وسیله ده څو د نړی د ځوانانو سترګی او ذهنیت د خشونت او وینو سره آشنا او نرم زړونه ئی ور کلک او بی رحمه کړی څو د نړی په مختلفو سیمو کی د استعماری او بی رحمه جنګونو د مظلومو قربانیانو په وړاندی د ترحم او زړه سوی غریزه کمزوری کړی.
لنډه دا چی نه ددې ورزش لوبغاړی د سړی زامن دی او نه هلته په هال کی ور ته ناست کسان (چی په سل ګونو ډالرو ئې یو ټکټ رانیولی دی ) د سړی زامن دی.
زه محمد علی کلی ته د هغه د نورو خیریه کارونو پخاطر کلک درناوی لرم او ستاینه ئی کوم خو د بوکس د ورزش څخه می سخته کرکه کیږی ځکه بوکسینګ هم د انسانی کرامت خلاف کړنه ده ( د یو انسان د بدن هر غړی خصوصاً مخ ستر شرافت لری، په حقیقت کی مخ د انسان د ټول هویت او ماهیت یوه رُڼه هنداره ده) نو ځکه باید سپک و نه ګڼل سی او و نه ټَکَوَل سی ).