تاند (پنجشنبه، د میزان ۱۲ مه) د افغانستان د خبریالانو مرکز (AFJC) ویلي چې د طالبانو د استخباراتو ادارې په غزني ولایت کې د «خوشحال» خصوصي راډیو رییس حکمت ارین نیولی دی.
مرکز پرون (چهارشنبې) په یوه بیان کې وویل چې یوې ځایي سرچینې ورته وویل چې ښاغلی ارین د یکشنبې په ورځ په خپل دفتر کې نیول شوی دی.
دا په داسي حال کې ده چې د طالبانو د اطلاعاتو او کلتور وزارت او همداراز د طالبانو د حکومت ویاند ذبیح الله مجاهد په ځلونو ویلي چې د رسنیو اړوند مسایلو کې به یوازې د رسنیو د سرغړونو کمیسیون کار لري او که هر ډول شکایت و، دا کمیسیون به یې تعقیبوي.
د افغانستان د خبریالانو مرکز د یوې سرچینې په قول ویلي چې ښاغلي ارین په یوه اډیو ټیپ کې د طالبانو د تیرو جګړو د ځانمرګو عملیاتو په اړه خبرې کولې او په رادیو کې یې خپرولې.
طالبانو تر اوسه په دې اړه څه نه دی ویلی.
د افغانستان د بریالانو مرکز وایي چې ښاغلی ارین باید بې قیدوشرطه خوشي شي.
د ۲۰۲۱ کال د اګست په ۱۵مه په افغانستان کې د طالبانو له واک ته رسیدو وروسته، طالبانو کڼ شمېر خبریال د لنډ او اوږد وخت لپاره نیولي دي. یو شمېر خبریالان د طالبانو په زندانونو کې له اوونیو او میاشتو تېرولو وروسته خوشې شوي دي.
په عین حال کې سلګونه خبریالان له هیواده وتلو ته اړ شوي دي.