تاند (شنبه، د میزان ۷ مه) له ننګرهار څخه ترلاسه شوي راپورونه وايي چې نن ماښام ناوخته د دغه ولایت په ګوشته ولسوالي کې پر دیورند کرښه د افغان او پاکستاني ځواکونو ترمنځ شدیده نښته بیل شوې ده.
شاهدان وايي، دواړه خواوې له درنو او سپکو وسلو کار اخلي.
له نژدې یوې اوونۍ راهیسي په ګوشته کې د دواړو خواو ترمنځ نښتې کېږي.
د جمعې په ورځ سهار وروسته لهدې په دې سیمه کې نښته وشوه چې یوه ورځ ترې وړاندې یعني د جمعې په ورځ دواړو خواوو د یو بل مورچې په درنو او سپکو وسلو وویشتې.
د چهارشنبې په ورځ هم له ګوشتې ولسوالۍ څخه د نښتو خبرونه ورکړل شوي وو.
د پاکستان او طالبانو حکومتونو تراوسه پورې د دې نښتې په اړه څه نه دي ویلي.
تر دې وړاندې د ځاځي میدان او کورمې ترمنځ د دواړو خواوو ترمنځ څو ځلې نښتې وشوې او ځینو پاکستاني رسنیو د خپلو امنیتي چارواکو په قول د هغو دلیل د طالبانو له لوري کرښې ته نژدې د پوستو د جوړولو پر سر اختلاف بللی وو.