تاند (یکشنبه، د سنبلې ۱۷ مه) د افغانستان پخواني ولسمشر حامد کرزي په هېواد کې د پولیو د مثبتو پېښو پر زیاتېدو اندېښنه ښودلې او له طالبانو یې غوښتي چې په ټول هېواد کې د واکسین د کمپاین د تطبیق لپاره ښه شرایط برابر کړي.
حامد کرزي پرون (شنبې) په یوه پیغام کې، چې پر خپله ایکسپاڼه (پخواني ټویټر) یې خپور کړ، یو ځل بیا په افغانستان کې د نجونو د ښوونځیو او پوهنتونونو د پرانستلو غوښتنه وکړه.
ده په هیواد کې له بېوزلۍ، ناروغۍ او نورو ننګونو سره د مبارزې لپاره د تعلیمي موسسو پر اړتیا، چې نجونې هم پکې شاملې وي، ټینګار وکړ.
پخواني ولسمشر د سواد او پوهاوي ټیټه کچه په هېواد کې د روغتیايي ستونزو لوی علتونه په ګوته کړل.
ده د طالبانو له حکومته وغوښتل چې د نجونو پر مخ ښوونځي او پوهنتونونه بېرته پرانېزي ځکه چې دا پر دغو ستونزو د لاسبري لور ته مهم ګام دی.
افغانستان او پاکستان په نړۍ کې هغه دوه هیوادونه دي چې لا هم د پولیو ویروس محوه شوي نه دي.
په دې وروستیو کې د روغتیا نړیوال سازمان په افغانستان کې د پولیو د پېښو د زیاتوالي په اړه اندېښنه ښودلې او ویلي یې دي، چې له هلوځلو سره سره په ۲۰۲۴ کال کې په افغانستان کې د پولیو ۱۸ پېښې ثبت شوې دي.
دا په داسي حال کې ده چې پاکستان هم د ۱۸ مثبتو پېښو خبر ورکړی دی.