تاند (یکشنبه، د سنبلې ۱۱ مه) طالبان وايي، د افغانستان په محبسونو کې له نژدې ۱۱ زره بندیانو څخه لږ تر لږه ۱۰۰۰ یې ښځې دي.
د طالبانو د محابسو د ادارې عمومي ريیس محمد یوسف مستري نن (یکشنبې) په کابل کې په یوه خبری کنفرانس کې وویل چې د ۱۱۰۰۰ بندیانو په منځ کې نژدې ۸۰۰ ماشومان هم شامل دي.
مستري زیاته کړه چې شاوخوا ۱۲ زره نور کسان په توقیف ځایونو کې ساتل کیږي او د محکمې پریکړو ته انتظار باسي.
ده په افغانستان کې د بهرنیو بندي اتباعو شمېر ۱۵ تنه وښود.
د طالبانو د محابسو د عمومي ريیس په وینا، ۶۰۰۰ افغانان په ایران او ۲۵ په چین کې بندیان دي.
ګڼ شمېر افغانان په سعودي عربستان، متحده عربي اماراتو او پاکستان کې بندیان دي خو د طالبانو د محابسو ريیس یې په اړه څه ونه ویل.
هغه په ټینګار سره وویل چې د اسلامي امارت په بیا واکمنېدو سره، د افغانستان په هېڅ زندان کې له بندیانو سره ناوړه چلند نه دی شوی او نه هم وهل او ډبول شوي دي؛ بلکې له ټولو سره یې انساني چلند کېږي.