موږ اکثره وخت د نورو په تجربو او نظرياتو پسې لالهانده وو، کوشش مو دا وي چې څنګه د نورو خبرې او تجربې راخپلې او زده کړو، حال دا چې نه له خپلو تجربو زده کړه کوو، نه مو يې کله د قلم بند کولو هڅه کړې او نه مو په خپل ظاهري او باطني ژوند کې راجذب کړې دي.
مثال: د ارواپوهنې په برخه کې زموږ ډېری مطالعه د زېړې ارواپوهنې يا انګېزه شي کتابونو په برخه کې وي. دا سمه ده چې د مبتدي لوستونکو لپاره د انګېزه شي کتابونو لوستل په دې ګټور دي چې دوی ته د مطالعې لپاره یو لوری او طریقه ورښودلی شي، خو ډېره لوستنه يې په دې ښه نه ده چې هرې خبرې ته يې د عمل جامه وراغوستل سخت دي او دا کار یې د لوستونکي بې باوري د زېړې روانپوهنې په متخصیصینو منځته راوړي.
په پښتو ژبه کې د دې برخې تر ټولو غوره کتاب “ارواپوهنه د ټولو لپاره” کتاب دی.
دا کتاب چې استاد مصطفی صفا لیکلی، ما د دوهم ځل لپاره ولوست.
دا کتاب نه یوازې موږ ته د ارواپوهنې اړوند ځينې مسایل په تخنیکي ډول معرفي کوي، بلکې له هرې موضوع سره تړلې داسې انګېزه شي جملې هم په ځان کې لري چې زموږ په ټولنه کې یې د عملي جنبې فیصدي زیاته ده.
دا کتاب که موږ په پنځو برخو ووېشو نو معرفت به يې په لاندې ساده ټکو کې بیان کړو:
کتاب په لومړۍ برخه کې موږ ته ارواپوهنه، ذهن، شعور او لاشعور، احساس او ادراک، هيجان، انګېزه، عادت، اراده او…. په رسمي او درسي ډول معرفي کوي.
دوهمه برخه مو د ځینو رواني امراضو لکه، ذهني کمزوري، رواني ستونزې او حالت، وېره، وسواس، اضطراب، سادېزم، نارسېسېزم، اندېښنه، غوسه، ناکامي او ځينې نورو په کنټرول او د مخنیوي په لارو چارو پوهوي.
درېیمه برخه د ځينې عالمانو نظرونه د شخصیت په اړه راسپړي. په ورپسې برخه کې خوشالي، د خوشالۍ په کشف، له خوشالۍ سره پر تړلو عواملو او نورو باندې ژور بحث شتون لري.
په کتاب کې په ځينو روانپوهنیزو مشورو هم ګټورې خبرې شته. همداراز د کتاب په وروستۍ برخه کې شل ارواپوهنیز حکایتونه راوړل شوي دي.
دا کتاب ځکه د ټولو لپاره دی چې مغلق او مبهم موضوعات پکې په ډېره عامه او ساده ژبه لیکل شوې دي.
دا کتاب د خپل اغېزمنتوب له امله تر درېیم چاپ هم وتلی دی.
د کتاب دویم چاپ چې شاوخوا تر 420 مخونو رسېږي، په 1396 کال مستقبل خپرندويه ټولنې را ایستلی دی.
په مطالعې د روږدي کېدو لپاره شاید ډېری کسان له ناول، لنډې کیسې یا انګېزه شي کتابونو څخه پیل غوره وګڼي، خو زما په اند ارواپوهنه د ټولو لپاره يې هم غوره ادرس دی.