تاند (شنبه، د سرطان دوهمه) د پکتیا د ځاځي اریوب ولسوالۍ په سپینه شګه سیمه کې د دغه ولایت دودیزه کلنۍ مشاعره( نښتر) ترسره شوه.
دې مشاعرې ته د طالبانو د اطلاعاتو او فرهنګ وزارت مرستیال مولوي عتیق الله عزیزي او یو شمېر نور چارواکي ورغلي وو.
په دې مشاعره کې لسګونه شاعرانو او ترنم ویونکو ګډون کړی او شعرونه یې واورول.
د طالبانو مرستیال وزیر عتیق الله عزیزي په دې مشاعره کې له شاعرانو او لیکوالو وغوښتل، چې د دوی د رژیم په ګټه لیکنې او شعرونه وړاندې کړي.
طالب چارواکي په نورو سیمو کې هم تورن شوي، چې فرهنګي مناسبتونه او فعالیتونه یې د نورو برخو په شان سیاسي کړي او پر خپل محور څرخولي، چې د غیر طالب څېرو د منزوي کیدو سبب شوی.