شنبه, جولای 20, 2024
Homeخبرونهترکیه: د ښځو په اړه د طالبانو اقدامات اسلامي نه دي

ترکیه: د ښځو په اړه د طالبانو اقدامات اسلامي نه دي

تاند (چهارشنبې، د جوزا ۳۰ مه) د یو شمېر اسلامي هېوادونو استازو پرون (سې شنبې) د ملګروملتونو د بشري حقونو د شورا په غونډه کې د طالبانو په واکمنۍ کې په افغانستان کې د ښځو وضعیت ناوړه وباله.

د ترکیې استازي د دغه هېواد د ولسمشر له قوله ویلي، له زده کړو د افغان مېرمنو محرومول نه انساني او نه اسلامي کار دی.

په افغانستان کې د بشري حقونو د وضعیت په اړه د ملګروملتونو ځانګړي راپورتر ریچارډ بینیټ د جوزا په ۲۹ مه د سې شنبې په ورځ د بشري حقونو شورا ته د طالبانو د تبعیضي سیاستونو په اړه خپل انتقادي راپور وړاندې کړ.

د لوېدیځو حکومتونو ترڅنګ د لویو اسلامي هېوادونو په ګډون غړو هېوادونو په افغانستان کې د بشري حقونو په تېره بیا د ښځو پر وضعیت نیوکې وکړې.

ترکیه، قطر او ایران، چې له طالبانو سره ښې اړیکې لري، د افغان ښځو وضعیت کړکیچن وباله او له زده کړو او کار څخه یې د هغوی محرومیت رد کړ.

په ملګروملتونو کې د ترکیې استازي وویل، ټولشموله حکومتولۍ، د اساسي حقونو درناوی، په ځانګړې توګه د ښځو حقونو ته درناوی د یوه هېواد د ثبات لپاره حیاتي دي.

هغه د ترکیې د ولسمشر رجب طیب اردوغان څرګندونو ته په اشارې وویل چې له زده کړو د نجونو محرومول نه انساني او نه اسلامي کار دی.

د ترکیې استازي ټینګار وکړ چې “نړیواله ټولنه باید طالبان دې ته اړ کړي چې د بشري حقونو د ښه کولو لپاره ګامونه پورته کړي.”

طالبانو ویلي چې د دوی تګلارې له شرعي احکامو او د افغاني ټولنې له دودونو سره سمې دي.

په ملګروملتو کې د ایران استازي ته بیا د افغانستان د قومي، ژبنۍ او کلتوري تنوع مهمه ښکاره شوه، ویې ویل چې په افغانستان کې دې جامع حکومت جوړ شي.

ده پر طالبانو غږ وکړ چې “هغه تبعیضي فرمانونه لغوه کړي چې د ښځو او نجونو اساسي حقونه محدودوي.”

د ملګروملتونو د بشري حقونو په شورا کې د روسیې استازي وویل چې له طالبانو سره له خبرو پرته په افغانستان کې دایمي سوله او ثبات ناشونی دی، په ځانګړې توګه د بشري حقونو په برخه کې ښه والی نه شي راتلای.

ایوګیني ویکتوروف په افغانستان کې د توکمیزو استازو په ګډون د یوه ټولشموله حکومت پر جوړولو ټینګار وکړ.

د روسیې استازي د بشري حقونو د شورا په ۵۶مه غونډه کې چې افغانستان ته ځانګړې شوې وه، وویل، مسکو د پوهنې او کارموندنې په برخه کې د افغان ښځو او نجونو د وضعیت په شمول اقتصادي وضعیت او بشري حقونه له نژدې څاري.

ویکتوروف یو ځل بیا په افغانستان کې د یوه ټولشموله حکومت پر جوړېدو ټینګار وکړ او ویې ویل: یوه ډېره مهمه مسله په افغانستان کې د دې هېواد د ټولو توکمونو او اقلیتونو د استازو په ګډون په بشپړ ډول د ټولشموله حکومت جوړول دي.

LEAVE A REPLY

Please enter your comment!
Please enter your name here

- Advertisment -

ادب