د دې ادارې د مالیاتو کارپوهانو په خپل راپور کې ویلي چې په روان مالي کال کې د حکومت عاید ۷۶ زره ۹۱۳ میلیارده روپۍ دی.
د پیسو نړیوال صندوق اټکل کړی چې د مالي کال تر پایه به د حکومت بهرنۍ پور ۳۰۶۷۱ میلیارده روپۍ پاتې شي.
د پاکستان د مالیې وزارت وايي، د سود د لوړې کچې لامل دا دی، چې نژدې ۸۰ سلنه کورني او بهرني پورونه د سود د ورکړې لپاره کارول کېږي.
د مالیې وزارت د معلوماتو له مخې د سعودي عربستان ۵ میلیارده ډالره، د متحده عربي اماراتو ۳ میلیارده او د چین ۴ میلیارد ډالره پورونه ځنډول شوي دي.
په وروستیو ورځو کې پاکستان د پیسو له نړیوال صندوق (IMF) څخه د نوي پور د ترلاسه کولو لپاره دغه صندوق ته د خپلو لګښتونو د کمولو پلان وړاندې کړی دی.
د پیسو نړیوال صندوق په پرله پسې ډول پر پاکستان ټینګار کړی چې د خپل اقتصاد د ښه کولو لپاره باید اقتصادي اصلاحات وکړي، حکومت باید اداري پړسوب او لګښتونه کم کړي او له شتمنو ډلو مالیې واخلي.
ځینې څیړونکي په دې باور دي چې د پورونو د زیاتوالي تر ټولو لوی لامل د بودیجې کسر دی چې له امله یې حکومتونه پرله پسې پورونه اخلي.
پاکستان په تیرو وختونو کې له سخت اقتصادي بحران سره مخامخ و، تر دې چې د اقتصادي سقوط احتمال یې رامنځته کړی و، خو وروسته یې له نړیوال وجهي صندوق سره د درې ملیارد ډالرو د لنډ مهاله پور موافقه لاسلیک کړه چې په وسیله یې خپل ځپل شوی اقتصاد وژغوري.
د پاکستان د مالیې په وزارت کې سرچینې وايي چې پاکستان اوس یو ځل بیا هڅه کوي چې د پیسو له نړیوال صندوق څخه له شپږو تر اته میلیارده ډالرو پور ترلاسه کړي، خو نړیوال وجهي صندوق په پرله پسې ډول له پاکستانه غواړي چې د خپلې پراختیايي بودیجې لګښت کم کړي.