تاند ( ۴ شنبه، د ثور ۲۶مه) د کندهار لپاره د طالبانو ځایي چارواکو ویلي، چې د افغاني بانکنوټونو د ترویج هڅې یې ګړندۍ کړي او هغه کسان مجازاتوي چې دغه بانکنوټونه نه کاروي.
د طالبانو د والي مرستیال مولوي حیاتالله مبارک ویلي، چې هڅې یې په دې برخه کې تر ډېره بریالۍ دي، خو بیا هم ځینې خلک د دوی له پرېکړو سرغړونه کوي.
د طالبانو ولایتي ادارې نه ده مشخصه کړې، چې دا سرغړونکي څوک دي او کوم بانکنوټونه کاروي، خو کندهار کې له پخوا څخه د پاکستاني کلدارو استعمال دود و.
طالب چارواکو دا هم نه دي ویلي، چې دغو سرغړونکو سره د کومې کړنلارې له مخې چلند کوي او سزا ورکوي.
طالبانو له ایران سره په نږدې ولایتونو کې هم د افغانیو د ترویج د هڅو خبر ورکړی، چې ستاینه یې شوې.
د طالبانو له بیا واک ته رسېدو سره، د افغانيو د ارزښت ساتلو او ترویج لپاره د دوی هڅې ستایل شوي.