تاند (سې شنبه، د ثور ۱۱ مه) د طالبانو د حکومت د ترانسپورت او هوايي چلن وزارت د هواپېژندنې ادارې له اټکل سره سم به نن (سې شنبې) د افغانستان په یو شمېر ولایتونو کې باران او واوره واوري.
د هواپېژندنې ادارې وړاندوینه کړې چې نن په خوست، پکتیا، لوګر، کابل، ننګرهار، لغمان، کونړ، نورستان، تخار او بدخشان کې د واورې، باران، برېښنا او تالندې او همداراز سیلونو احتمال شته.
دې ادارې وړمه ورځ د پرون (دوشنبې) لپاره په ۱۷ ولایتونو کې د ورښتونو وړاندوینه کړې وه.
سږني ورښتونه، چې د ژمي له لومړیو دوو وچو میاشتو وروسته پیل شوي، لږترلږه په څو لسیزو کې کمساري دي.
په همدې حال کې پرون له پېښو سره د مبارزې په چارو کې د دولت وزارت وویل چې تراوسه پورې د سیلونو او شدیدو ورښتونو له کبله ۷۷ تنه مړه شوي، سلګونه کورونه او زرګونه هکتاره کرنیزه مځکه ویجاړه شوې او سلګونه څاروي تاف شوي دي.