تاند (شنبه، د ثور لومړۍ) راپورونه وایي، چې د ایران حکومت د دغه هېواد په مشهد ښار کې څلور تنه افغان کډوال اعدام کړي.
د بشري حقونو یوه سازمان ویلي، چې د ایران حکومت دغه افغانان د نشه یي توکیو په تور اعدام شوي.
د اعدام شویو دغو افغانانو نومونه زمان طاهري، سلام طاهري، غلام قادر ساماني او ابراهیم نورزی ښودل شوي.
د ایران حکومت او په کابل کې د طالبانو واکمن رژیم په دې اړه څه نه دي ویلي.
ایران تر دې مخکې هم ګڼ افغانان په ورته او نورو تورونو اعدام او مجازات کړي.
د طالبانو له بیا واک ته رسېدو سره، دوی بیا- بیا د ایران له زندانونو د لسګونو افغان بندیانو د خوشې کېدو او دوی ته د سپارل کېدو خبر ورکړی.
ایران له پاکستان څخه وروسته د افغان کډوالو پر وړاندې د ډېر ناوړه چلند په کولو تورن هېواد دی.
په کابل کې د طالبانو واکمن رژیم بیا په دغو هېوادونو کې مېشتو افغان کډوالو ته په نه پاملرنې او د ستونزو په اړه یې په غږ نه پورته کولو تورن دی.